Өчигдөр буюу 2025 оны 07 дугаар сарын 24-ний өдрийн орой дуу цахилгаантай аадар бороо 21:37-23:21 цагт /завсарлагатай/, салхины дундаж хурд 14-18 м/с, зарим үед 20-33м/с хүрч, ширүүсэн цаг агаарын аюултай үзэгдэл болсон. Уг үзэгдэл манай аймгийн Эрдэнэсант, Лүн, Жаргалант, Угтаал, Бүрэн, Зуунмод, Аргалант сумдын нутгаар дайрч багагүй хохирол учруулжээ.

Аймгийн Онцгой комисс хуралдаж сумдаас ирсэн мэдээлэл, шуурга дэгдсэн газарт ажиллаж байгаа ажлын хэсгүүдийн мэдээллийг сонсож цаашид авах арга хэмжээний талаар хуралдлаа.

Дээрх сумдад урьдчилсан байдлаар дараах хохирол учирсан байна.

1. Аргалант сумын сургуулийн дотуур байрны дээвэр хууларч, 7 айл өрхийн гэр нурсан.

2. Баянхангай сумын сургуулийн гал тогоо, спорт заал, төрийн алба хаагчдын байр, xaлyyн усны барилгуудын дээвэр хууларсан. Мөн 4 ханатай 10, 5 ханатай гэр 44 нуржээ.

3. Лүн суманд 1З айл өрхийн гэр, 13 хашаа нурж, 10 хонь хорогдсон. Мөн сумыг цахилгаан хангамжаар тэжээдэг 35 кВт-ын цахилгаан дамжуулах агаарын шугамд тулгуур унасны улмаас Лүн сумын ААН-99, айл өрх-384 нийт 483 хэрэглэгчийн цахилгаан хангамж тасалдаад байна.

4. Эрдэнэсант сумын 2 өрхийн гэр нурсан гэсэн мэдээлэл одоогоор ирээд байгаа ба цаашид хохирлын хэмжээ нэмэгдэх төлөвтэй байгаа талаар холбогдох мэргэжилтнүүд хэлж байна.

Аймгийн Онцгой комисс үргэлжлүүлж газар дээр нь ажиллан хохирлыг нөхөх, сумдын үйл ажиллагааг хэвийн болгох ажлыг нэн тэргүүнд хийхээр төлөвлөж байна.